တန့်ဆည်-ကလေးဝ ကားလမ်းဘေးမှာရှိတဲ့ ကံထူးမရွာမှာဖွင့်လှစ်ထားတဲ့ ဓါတ်ဆီဆိုင်နဲ့ အနီးပတ်ဝန်းကျင်ကို ဦးတည်တိုက်ခိုက်ခဲ့တာဖြစ်ပြီး လတ်တလောတိုက်ပွဲဖြစ်ပွားတာမရှိဘူးလို့ ဒေသခံတော်လှန်ရေးတပ်တွေက အသိပေးပါတယ်။

ဗုံးကျပြီးနောက်မှာ ကံထူးမရွာက ဓါတ်ဆီဆိုင်လည်း မီးလောင်ကျွမ်းခဲ့ပြီး သေဆုံးသူတွေရဲ့ ရုပ်အလောင်းတွေလည်း အများအပြားပျက်စီးနေတာကြောင့် ဒေသကာကွယ်ရေးအဖွဲ့တွေက သေဆုံးသူနဲ့ ထိခိုက်ဒဏ်ရာရရှိသူ အတိအကျရဲ့ စာရင်းကို ကောက်ယူနေဆဲပဲလို့ မြေပြင်တော်လှန်ရေးတပ်ဖွဲ့တချို့က ပြောပါတယ်။

ဗုံးကြဲခံရတဲ့ ကံထူးမရွာဟာ ဒေသတွင်းတိုက်ပွဲတွေကြောင့် စစ်ဘေးရှောင်တွေ အများအပြားရောက်ရှိနေတဲ့ ဒေသတစ်ခုဖြစ်ပြီး တော်လှန်တပ်တွေရဲ့ စိုးမိုးနယ်မြေမှာရှိနေတာပါ။

စစ်ကော်မရှင်ရဲ့ လော်ဘီ တယ်လီဂရမ်ချယ်နယ်တချို့မှာတော့ ကံထူးမရွာက PDF တပ်စခန်းကို YAK-130 အမျိုးအစား ဂျက်ဖိုက်တာနဲ့ ဗုံးကြဲတိုက်ခိုက်ခဲ့တယ်လို့ ဖော်ပြနေကြပါတယ်။

တိုက်နယ်ရဲစခန်းလည်းရှိတဲ့ ကံထူးမကျေးရွာကို ပြီးခဲ့တဲ့နှစ် မတ်လပိုင်းက ဒေသတွင်း PDF တပ်တွေက တိုက်ခိုက်သိမ်းယူထားတာပါ။

ဒီနှစ်ကုန်မှာ ကျင်းပဖို့ရှိနေတဲ့ ရွေးကောက်ပွဲအတွက် နယ်မြေစိုးမိုးမှုတွေ ပြန်လည်ရရှိလိုနေတဲ့ စစ်ကော်မရှင်တပ်ဟာ ပြီးခဲ့တဲ့လပိုင်းကစပြီး တော်လှန်ရေးတပ်တွေရဲ့ နယ်မြေတွေအပြင် အရပ်သားပစ်မှတ်တွေကိုပါ လေကြောင်းတိုက်ခိုက်မှုတွေ အရှိန်မြှင့်လုပ်ဆောင်လာပါတယ်။

ပြီးခဲ့တဲ့တစ်လထဲမှာပဲ စစ်ကော်မရှင်ဟာ လေကြောင်းတိုက်ခိုက်မှု အကြိမ် ၂၂၀ ကျော် ပြုလုပ်ခဲ့တယ်လို့ အမျိုးသားညီညွတ်ရေးအစိုးရ (NUG) လူ့အခွင့်အရေးဝန်ကြီးဌာနက ထုတ်ပြန်ထားပါတယ်။

အာဏာသိမ်းတပ်ဟာ ပြီးခဲ့တဲ့လပိုင်းကစပြီး ဒီးမော့ဆိုမြို့အတွင်းကို အင်အားအလုံးအရင်းနဲ့ စစ်ကြောင်းထိုးလာပြီး ဒီးမော့ဆို-ဖရူဆို-ဘော်လခဲ လမ်းပိုင်းတစ်လျှောက် တိုက်ပွဲတွေဖြစ်နေတယ်လို့လည်း အသိပေးထားပါတယ်။

လက်ရှိမှာတော့ ဒီးမော့ဆိုနဲ့ ဖရူဆိုမြို့တွေမှာ အင်အားအလုံးအရင်းနဲ့ စုဖွဲ့ထားတဲ့ စစ်ကော်မရှင်တပ်ရဲ့ ယာဉ်တန်းဟာ ဖရူဆိုမြို့နယ်က အမှတ် (၁၄) တန်းမြင့် စစ်လေ့ကျင့်ရေးကျောင်းမှာ ရောက်ရှိနေပြီး အဲဒီကနေ ကရင်နီအလယ်ပိုင်းဒေသ ဘော်လခဲကို ဦးတည်စစ်ကြောင်းထိုးဖို့ ပြင်ဆင်နေတယ်လို့ KNDF က အသိပေးထားတာပါ။

တော်လှန်ရေးတပ်တွေ အားကောင်းတဲ့ ကရင်နီဒေသကို လာမယ့်ရွေးကောက်ပွဲမတိုင်မီ ပြန်လည်ထိန်းချုပ်လိုတာကြောင့် စစ်ကော်မရှင်တပ်ဟာ အခုလို စစ်ကြောင်းတွေ ထိုးလာတာလို့ သုံးသပ်မှုတွေလည်း ရှိနေပါတယ်။

ဒီးမော့ဆိုမြို့ကို ဗဟိုပြုပြီး အင်အားစုဆောင်းကာ ကရင်နီတောင်ပိုင်း မိုးဗြဲနဲ့ မြောက်ပိုင်း ဖရူဆိုနဲ့ ဘော်လခဲမြို့တွေကို စစ်ကော်မရှင် စစ်ကြောင်းတွေ ဖြန့်ကျက်လှုပ်ရှားလာတယ်လို့ မြေပြင်သတင်းရင်းမြစ်တချို့က ပြောပါတယ်။

“ဒီးမော့ဆိုမှာ ဗဟိုပြုပြီး စစ်ကြောင်းတွေ ပို့နေတာပါ။ ဒီလလယ်လောက်ထဲက မြောက်ပိုင်းတွေကိုပါ ထိုးစစ်ဆင်လာတယ်။ သူတို့စစ်ကြောင်းက ဘောလခဲမြို့အထိ မိန်းလမ်းမကြီးဝဲယာ အတိုင်း နှစ်ကြောင်းခွဲပြီးတက်လာမယ်။ အဲဒီမိန်းလမ်းတစ်လျှောက် ရှင်းလင်းသွားမယ်လို့ ယူဆရတယ်” ဒေသတွင်းသတင်းရင်းမြစ်တစ်ဦးက ပြောပါတယ်။

ဘော်လခဲမြို့နယ်မှာ မြို့ပေါ်ရပ်ကွက်တွေကို စစ်ကော်မရှင်တပ်က စိုးမိုးထားသလို ဘော်လခဲအခြေချစစ်ဗျူဟာနဲ့ ခြေမြန်တပ်ရင်းတချို့လည်း ရှိနေတာပါ။

အဓိကလမ်းမကြီးကိုတော့ တော်လှန်ရေးတပ်တွေက စိုးမိုးထားပြီး တိုက်ပွဲတွေကြောင့် ဒီလမ်းပိုင်း ဖြတ်သန်းသွားလာလို့မရတာ တစ်နှစ်ကျော်ကြာရှိနေပြီလို့ ဒေသတွင်း သတင်းရင်းမြစ်တချို့က ပြောပါတယ်။

စစ်ကော်မရှင်တပ်ဟာ ဘော်လခဲမြို့ကို လေကြောင်းကနေပဲ သွားလာလို့ရနေတာကြောင့် ဒီလမ်းပိုင်းပိတ်ဆို့ထားတာကို ပြန်ဖွင့်နိုင်ဖို့ အခုလို စစ်ကြောင်းထိုးလာခဲ့တာပါ။

လက်ရှိမှာ တော်လှန်ရေးတပ်တွေထိန်းချုပ်ထားတဲ့ ဒီးမော့ဆိုမြို့နယ်က ဒေါငံခါးရပ်ကွက်ကိုလည်း စစ်ကော်မရှင်တပ်က အင်အားအလုံးအရင်းနဲ့ ထိုးစစ်ဆင်တိုက်ခိုက်နေတာကြောင့် တိုက်ပွဲတွေပြင်းထန်နေပြီး ဒေါငံခါးနဲ့ အနီးတဝိုက် ကျေးရွာတွေကို လေကြောင်း၊ လက်နက်ကြီး၊ ဒရုန်းတွေနဲ့ ဆက်တိုက်ခိုက်နေတယ်လို့ KNDF က အသိပေးထားပါတယ်။

ဒါ့အပြင် စစ်ကော်မရှင်တပ်ရဲ့ စစ်ကြောင်းဟာ ဖယ်ခုံမြို့နယ်ထဲမှာလည်း ဒေသတွင်း PNO တပ်တွေနဲ့အတူ ပူးပေါင်းပြီး စစ်ကြောင်းတွေ ဖြန့်ကျက်လှုပ်ရှားနေတယ်လို့ ဆိုပါတယ်။

ပြီးခဲ့တဲ့နှစ်လကလည်း ကရင်နီနဲ့ ရှမ်းတောင်အစပ်မှာရှိတဲ့ မိုးဗြဲမြို့ကို အင်အားအလုံးအရင်းနဲ့ စစ်ကော်မရှင်စစ်ကြောင်းထိုးခဲ့ပြီး မိုးဗြဲ-လွိုင်ကော်လမ်းပိုင်းကို ပြန်လည်ဖွင့်လှစ်ခဲ့ပါသေးတယ်။

လာမယ့် ဒီဇင်ဘာ ၂၈ ရက်မှာ ကျင်းပဖို့ စီစဉ်ထားတဲ့ ရွေးကောက်ပွဲကို ကရင်နီဒေသက ပြည်နယ်မြို့တော်လွိုင်ကော်အပါအဝင် ၊ ဒီးမော့ဆို၊ ဖရူဆို၊ ဖားဆောင်း၊ ဘော်လခဲ၊ မယ်စဲ့နဲ့ ရှားတောမြို့တွေမှာကျင်းပသွားမယ်လို့ အာဏာသိမ်းစစ်တပ်က ထုတ်ပြန်ထားတာပါ။

မြေပြင်သတင်းရင်းမြစ်တွေရဲ့ပြောပြချက်အရ အာဏာသိမ်းစစ်တပ်ဟာ လေးကေ့ကော်မြို့သစ်နယ်မြေထဲကို အခုလ ၂၁ ရက်က စစ်ကြောင်းထိုးဝင်ရောက်လာပြီး တိုက်ပွဲတွေပြင်းထန်နေတာပါ။

မြဝတီမြို့တွင်းက ခလရ ၂၇၅ ၊ လက်ခတ်တောင်အပါအဝင် အာဏာသိမ်းစစ်တပ်ရဲ့ စစ်ကြောင်းတွေက လေးကေ့ကော်မြို့သစ်ကို မနေ့ကတည်းက လက်နက်ကြီးတွေပစ်ကူနေတာပါ။

“ဒီနေ့လည်း မစ်ဇိုင်းတွေနဲ့ပါ ပစ်တယ်”လို့ မြေပြင်သတင်းရင်းမြစ်တစ်ဦးကပြောပါတယ်။

လက်ရှိအချိန်ထိ တိုက်ပွဲမရပ်သေးသလို လက်နက်ကြီးသံတွေလည်း တစ်နေကုန်ကြားနေရကြောင်း မဲဆောက်မြို့မှာ နေထိုင်သူတစ်ဦးကပြောပါတယ်။

မြေပြင်မှာတော့ လက်နက်ကြီးအပြင် လေကြောင်းပစ်ကူတွေ၊ ဒရုန်းနဲ့ ဗုံးကြဲတိုက်ခိုက်တာတွေ အာဏာသိမ်းစစ်တပ်ဘက်က တောက်လျှောက်ပြုလုပ်ပြီး လေးကေ့ကော်ရရှိဖို့ ကြိုးစားနေတယ်လို့ သတင်းရင်းမြစ်ကပြောပါတယ်။

DKBA နှစ်ဖွဲ့၊ ကရင်နယ်ခြားစောင့်တပ်(BGF)တို့က အာဏာသိမ်းစစ်တပ်နဲ့အတူ ရပ်တည်လိုက်ပြီးနောက်မှာ ကေအဲန်ယူပူးပေါင်းတပ်တွေ ထိန်းချုပ်ထားတဲ့ မြဝတီ-သင်္ကန်းညီနောင်နဲ့ အာရှလမ်းကို အာဏာသိမ်းစစ်တပ်က လေကြောင်းထိုးစစ်နဲ့အတူ ဖိအားပေးရယူခဲ့တာဖြစ်ပါတယ်။

အဲဒီနောက်မှာတော့ မြဝတီ၊ မဲကနယ်၊ လက်ခတ်တောင်၊ လေးကေ့ကော်ဒေသတွေကို စစ်ကြောင်းတွေ ဆက်ထိုးတာကြောင့် တော်လှန်ရေးတပ်တွေနဲ့ တိုက်ပွဲတွေဆက်လက်ဖြစ်ပွားနေတာဖြစ်ပါတယ်။

ရှေ့တန်းသတင်းရင်းမြစ်တွေရဲ့ ပြောဆိုချက်အရ အာဏာသိမ်းစစ်တပ်ဟာ သူတို့ရဲ့ ရွေးကောက်ပွဲမတိုင်ခင် လေးလအတွင်း နယ်စပ်တလျှောက်က ကေအဲန်ယူသိမ်းထားတဲ့ စခန်းတွေကိုအားလုံးကို ပြန်ယူဖို့ စီစဉ်နေတယ်လို့ သိရပါတယ်။

လတ်တလောမှာတော့ တိုက်ပွဲတွေကြောင့် မြဝတီ-လေးကေ့ကော်ဒေသမှာ စစ်ရှောင်တွေ ထပ်တိုးလာပြီး ၃,၀၀၀ ဝန်းကျင်ရှိနေကာ နေရာထိုင်ခင်း၊ စားသောက်ရေး၊ ကျန်းမာရေးကိစ္စတွေအတွက် နီးစပ်ရာ တော်လှန်ရေးအဖွဲ့အစည်းတွေ၊ ပြည်သူတွေက ကူညီထောက်ပံ့နေကြတာတွေ့ရပါတယ်။

ဒီတစ်ပတ် ကောက်ယူထားတဲ့ နောက်ဆုံး စစ်ရှောင်စာရင်းအရ မြဝတီဘက်မှာ စစ်ရှောင်စခန်း ခုနစ်ခုရှိပြီး စစ်ရှောင်ဦးရေ ၂,၉၁၉ ဦး ရှိနေပါတယ်။

“လောလောဆယ်မှာ တစ်အိမ်ထောင်စုမှာ (ခြောက်ပြည်ပါ)ဆန်တစ်အိတ်ပေးတယ်၊ အရေးပေါ်စစ်ရှောင်အတွက်ပေါ့”လို့ စစ်ရှောင်စာရင်းကိုင်သူတစ်ဦးက ပြောပါတယ်။

မြဝတီဘက်ရှိ စစ်ရှောင်ပြည်သူတွေအတွက် ပုံမှန်အထောက်အပံ့ပေးနေတဲ့ အဖွဲ့အစည်းကတော့ ကရင်ပြည်တွင်း နေရပ်စွန့်ခွာသူများကော်မတီ(CIDKP)ဖြစ်ပြီး ကျန်အဖွဲ့အစည်းတွေလည်း လာရောက်ထောက်ပံ့တာ ရှိတယ်လို့ သူက ပြောပါတယ်။

“အထောက်အပံ့က အလုံအလောက်တော့ ဘယ်ရမလဲ၊ မလောက်လုံပေမယ့်လည်း အတိုင်းအတာတစ်ခု ဖူလုံတယ်”လို့ သူက ပြောပါတယ်။

ကေအဲန်ယူဦးဆောင်တဲ့ တော်လှန်ရေးပူးပေါင်းတပ်တွေ မြဝတီဒေသက နေရာတချို့ကို စိုးမိုးထားချိန်မှာ အာဏာသိမ်းစစ်တပ်ဘက်က လေကြောင်းထိုးစစ်သာ အဓိကပြုလုပ်နိုင်ခဲ့ပြီး ဒေသတွင်းစစ်ရှောင်တွေတချို့လည်း နေရပ်ပြန်နေထိုင်တာမျိုးတွေရှိခဲ့ပါတယ်။

အခုတော့ လေးကေ့ကော်မြို့သစ်အပါအဝင် မြဝတီဘက်မှာ လေးကေ့ကော်၊ မယ်ထော်တလေး၊ မင်းလက်ပံ၊ ဖလူး၊ ထီးမယ်ဝါးခီး၊ နို့ဖိုး၊ ကျောက်ခတ်စတဲ့ ကျေးရွာတွေအပါအဝင် ကျေးရွာအနည်းဆုံး ၁၀ ရွာအထက် စစ်ရှောင်နေကြရပါတယ်။

ဒေသခံတွေ စစ်ရှောင်နေကြတဲ့ ကျေးရွာတွေ၊ စခန်းတွေက စစ်ပွဲတွေနဲ့ နီးကပ်ပြီး လုံခြုံမှုမရှိတာကို တွေ့ရပါတယ်။

‎အာရှလမ်းနဲ့ သင်္ဃန်းညီနောင်ကို ထိုးဖောက်နိုင်ဖို့အတွက် အာဏာသိမ်းစစ်တပ်ကို ကူညီပေးနေသူတွေကတော့ ကရင်နယ်ခြားစောင့်တပ်-BGFနဲ့ KNA လို့ခေါ်တဲ့ BGF လက်အောက်ခံ ကရင်အမျိုးသားတပ်မတော်တို့ ဖြစ်ပါတယ်။

ကရင်နယ်ခြားစောင့်တပ်နဲ့ ဒီမိုကရေစီအကျိုးပြုတပ်မတော်(DKBA)တို့ဟာ အာဏာသိမ်းစစ်တပ်ရဲ့ ရွေးကောက်ပွဲကို ထောက်ခံကူညီမယ်လို့ ကြေညာခဲ့သလို ဗုဒ္ဓဘာသာ ပဌာန်း ၂၄ ပစ္စည်းဘက်တံဆိပ်တပ် မူလလက်ဟောင်း DKBA ကလည်း ကျုံဒိုး-အာရှလမ်း ထိုးဖောက်နိုင်ရေးအတွက် စစ်တပ်ဘက်က ကူညီနေတာဖြစ်ပါတယ်။

ပြီးခဲ့တဲ့ သီတင်းပတ်အကုန်ထိ တစ်ကျပ်သားကို ကျပ် ၇၉ သိန်းဝန်းကျင်မှာရောက်နေတဲ့ ပြည်တွင်းရွှေဈေးဟာ ဒီနေ့ ရုံးဖွင့်ရက်မှာ ပြန်လည်မြင့်တက်ခဲ့တာပါ။

ဒီနေ့ညနေပိုင်း ဈေးကွက်အပိတ်မှာတော့ တစ်ကျပ်သား ကျပ်သိန်း ၈၀ နဲ့ ပြည်တွင်းရွှေဈေး ထိပ်စီးပြောင်းသွားခဲ့တာပါ။

လက်ရှိမှာ ကမ္ဘာ့ရွှေဈေးဟာလည်း မတည်မငြိမ်ဖြစ်နေတာကြောင့် ပြည်တွင်းရွှေဈေးကလည်း လိုက်ပါလှုပ်ခတ်နေပြီး သတိထားအရောင်းအဝယ်လုပ်ဖို့ ရွှေဈေးကွက်လေ့လာစောင့်ကြည့်သူတချို့က သတိပေးပါတယ်။

“ကမ္ဘာ့ရွှေကလည်း မငြိမ်ဘူးဗျ။ တက်ရင်လည်းထိုးတက်ပြီး ပြန်ပြန်ကျလာတာ။ အရောင်းအဝယ်တွေတော့ ဂရုစိုက်ပေါ့ အတက်အကျ ကြမ်းနေတယ်လို့ ပြောလို့ရတယ်” လို့ ဈေးကွက် လေ့လာသူတစ်ဦး ပြောပါတယ်။

ကမ္ဘာ့ရွှေဈေးဟာ လက်ရှိမှာ ပြီးခဲ့တဲ့အပတ်က အမြင့်ဆုံးမြင့်တက်ခဲ့တဲ့ တစ်အောင်စကို USဒေါ်လာ ၃,၇၀၀ ကို ကျော်လွန်ကာ ဆက်လက်မြင့်တက်နေတယ်လို့ ဈေးကွက်လေ့လာသူတွေက ပြောပါတယ်။

ဩဂုတ်လ နောက်ဆုံးပတ်တုန်းက ပြည်တွင်းအခေါက်ရွှေဈေးဟာ တစ်ကျပ်သားကို ကျပ် ၇၅ သိန်းဝန်းကျင်မှာပဲ ရှိနေပြီး တစ်လအတွင်း တစ်ကျပ်သား ငါးသိန်းကျပ်ဝန်းကျင်ကို မြင့်တက်ခဲ့တာပါ။

ဒီနှစ် ဇွန်လပိုင်းကလည်း ပြည်တွင်းရွှေဈေးနှုန်းဟာ တစ်ကျပ်သားကို ကျပ်သိန်း ၈၀ ကျော်ကို စံချိန်တင်ရောက်ရှိခဲ့ပြီး စစ်ကော်မရှင်တပ်က ရွှေဆိုင်တွေကို လိုက်လံဖမ်းဆီးစစ်ဆေးတာ၊ ရွှေအရောင်းအဝယ်ဈေးကွက်တွေကို ပိတ်ပင်ခဲ့ပါသေးတယ်။

အခုလို ပြည်တွင်းရွှေဈေးဟာ တစ်ကျပ်သားကို ကျပ်သိန်း ၈၀ ဝန်းကျင်ရှိလာပေမယ့် စစ်တပ်လက်အောက်ခံ ရန်ကုန်တိုင်းရွှေလုပ်ငန်းရှင်အသင်းကတော့ ရည်ညွှန်းရောင်းဈေးကို တစ်ကျပ်သားကို ၅၉ သိန်းဝန်းကျင်ပဲ သတ်မှတ်ထားပြီး ရည်ညွှန်းဈေးနဲ့ ဈေးကွက်ပေါက်ဈေးက သိန်း ၂၀ ကျော်ထိ ကွာဟနေပါတယ်။

ရှမ်းနီတပ် (SNA) တွေ တပ်စွဲထားတဲ့ ဗန်းမောက်မြို့ကို ပြည်သူ့ကာကွယ်ရေးတပ် (PDF) တပ်တွေက ဒီလ ၁၅ မှာ ဝင်ရောက်တိုက်ခိုက်ခဲ့ပြီး သီတင်းပတ်တစ်ပတ်အတွင်း မြို့သိမ်းနိုင်ခဲ့တာပါ။

ဗန်းမောက်မြို့ဗျူဟာကုန်း၊ ဗန်းမောက်မြို့ရဲစခန်းတွေနဲ့ ကာကင်းစခန်းတွေအပါအဝင် SNA နဲ့ ပျူစောထီးတပ်တွေ အခြေချတပ်စွဲထားတဲ့ ကာကင်းစခန်း ၁၀ ခုထက်မနည်းကို သိမ်းပိုက်နိုင်ခဲ့တယ်လို့ တော်လှန်ရေးတပ်တွေက ဓါတ်ပုံမှတ်တမ်းနဲ့တကွ ထုတ်ပြန်ထားတာပါ။

ဒါ့အပြင် စစ်ကော်မရှင်တပ်ဆီက လက်နက်ခဲယမ်းတွေ အများအပြားသိမ်းဆည်းရမိတဲ့အပြင် SNA တပ်ဖွဲ့ဝင်အရာရှိတစ်ဦးအပါအဝင် အလောင်းခုနစ်လောင်းရရှိခဲ့ကာ တော်လှန်ရေးတပ်ဖွဲ့ဝင် ခြောက်ဦးလည်း မြို့သိမ်းတိုက်ပွဲမှာ ကျဆုံးခဲ့တယ်လို့ ဆိုပါတယ်။

လက်ရှိမှာ စစ်ကော်မရှင်တပ်နဲ့ SNA တပ်တွေဟာ မြို့ရဲ့အနောက်ဘက်ခြမ်းကို တပ်ဆုတ်ပေးထားပြီး မြို့ပြင်က ကျေးရွာတချို့မှာ ပြန်လည်တပ်စွဲတာတွေရှိတယ်လို့ ရှမ်းနီဒေသခံတစ်ဦးက ပြောပါတယ်။

“တိုက်ပွဲတော့ ဖြစ်နေတုန်းပဲ မြို့ပေါ်က အဓိကနေရာတွေတော့ အကုန်ဆုတ်ပေးလိုက်ရတယ်။ အကုန်ပါသွားတာတော့ မဟုတ်သေးဘူး။ SNA ကလည်း အင်အားစုပြီး ပြန်တိုက်မယ့်သဘောမျိုးတော့ သတင်းတွေကြားရတယ်” လို့ ၎င်းဒေသခံက ပြောပါတယ်။

ဒါ့အပြင် တိုက်ပွဲအတွင်းမှာ ဗန်းမောက်မြို့ပေါ်မှာ ပိတ်မိနေတဲ့ ဒေသခံအများအပြားရှိခဲ့ပြီး မနေ့က မနက်ပိုင်းမှာ ပိတ်မိနေတဲ့ဒေသခံ ရာနဲ့ချီပြီး တော်လှန်ရေးတပ်တွေနဲ့ ဒေသခံကယ်ဆယ်ရေးအဖွဲ့တွေက ကယ်ထုတ်ပေးခဲ့ရပါတယ်။

ဒါ့အပြင် SNA တပ်ဆုတ်သွားတဲ့ မြို့အနောက်ခြမ်းဘက်ကို စစ်ဘေးရှောင်ကြသူတွေလည်း ရှိနေတယ်လို့ ၎င်းဒေသခံတချို့က ပြောပါတယ်။

စစ်ကိုင်းတိုင်းအထက်ပိုင်း ကချင်ပြည်နယ်နဲ့ အစပ်မှာတည်ရှိတဲ့ ဗန်းမောက်မြို့ဟာ ရွှေနဲ့ သတ္တုတွင်း လုပ်ကွက်တွေ အများအပြားရှိပြီး အာဏာသိမ်းစစ်တပ်နဲ့ ရှမ်းနီအမျိုးသားများကာကွယ်ရေးတပ် (SNA) တပ်တွေ ပူးတွဲထိန်းချုပ်ထားတာပါ။

တော်လှန်ရေးတပ်တွေဟာ ရွှေဘို-မြစ်ကြီးနား ကားလမ်းပေါ်က အင်းတော်မြို့အပါအဝင် စစ်ကိုင်းတိုင်းအထက်ပိုင်းက ပင်လည်ဘူး၊ ဖောင်းပြင်၊ ရွှေပြည်အေးမြို့တွေကိုလည်း ထိန်းချုပ်ထားပြီး လက်ရှိမှာ ဗန်းမောက်မြို့ကိုပါ ထိန်းချုပ်လိုက်နိုင်တာပါ။

လွန်ခဲ့တဲ့ ခြောက်လခန့်က လှုပ်ခတ်ခဲ့တဲ့ စစ်ကိုင်းငလျင်ကြောင့် လူတွေအစုအပြုံလိုက်သေဆုံးခဲ့ပြီး မန္တလေးတိုင်း၊ အမရပူရမြို့နယ်၊ ဘုံးအိုးကျေးရွာမှာလည်း ၁၅၀ နီးပါးသေဆုံးခဲ့ရပါတယ်။

ရုပ်သံသတင်း

လက်ရှိမှာ သံဖြူဇရပ်၊ အနင်းဘူတာဟာ ရထားပြေးဆွဲတာမရှိဘဲ ရန်ကုန်ကနေ ကျိုက်ထို၊ မော်လမြိုင်ထိပဲ ရထားပြေးဆွဲနေတာပါ။

“အဲဒီဘက်မှာ ရထားမပြေးဘူး ဘူတာစောင့် ကင်းပဲရှိတာ။ စုစုပေါင်း ၁၀ ယောက်လောက်ရှိတာ။ ကျန်တဲ့သူတွေ ထွက်ပြေးသွားလို့ လေးယောက်ပဲသေသွားတယ်” လို့ သံဖြူဇရပ် ဒေသခံတစ်ဦးက ပြောပါတယ်။

ဒါ့အပြင် မနေ့က မွန်းလွဲပိုင်းမှာလည်း မော်လမြိုင်-သံဖြူဇရပ် ရထားလမ်းပိုင်းက ထင်းရှူးရွာ ဘူတာက လုံခြုံရေးကင်းစခန်းကို ဒရုန်းနဲ့ ဗုံးသီးချတိုက်ခိုက်ခဲ့ပြီး စစ်ကော်မရှင်တပ်ဘက်က ထိခိုက်သေဆုံးမှု ရှိနိုင်တယ်လို့ မွန်ပြည်တော်လှန်ရေးတပ် (MSRF) ကလည်း ဒီနေ့မှာ ထုတ်ပြန်ထားပါတယ်။

မွန်တော်လှန်ရေးတပ်တွေဟာ မကြာခဏဆိုသလို မွန်ပြည်နယ်ရဲ့ အဓိကလမ်းပိုင်းဖြစ်တဲ့ သံဖြူဇရပ်-ရေး ပြည်ထောင်စုကားလမ်းပိုင်းတွေမှာ စစ်ရေးလှုပ်ရှားမှုတွေ ဖော်ဆောင်နေတယ်လို့ ၎င်းဒေသခံတချို့က ပြောပါတယ်။

အရှေ့တောင်တိုင်းစစ်ဌာနချုပ်ရှိရာ မော်လမြိုင်မြို့ရဲ့တောင်ပိုင်း သံဖြူဇရပ်၊ ရေး မြို့နယ်တွေနဲ့ မွန်-ကရင်အစပ်၊ မွန်တနင်္သာရီအစပ်ဒေသတွေမှာ မွန်ပြည်သစ်ပါတီ(စစ်အာဏာရှင် တိုက်ဖျက်ရေး) NMSP(AD) ၊ မွန်ပြည်လွတ်မြောက်ရေးတပ်တော် (MLA ) တပ်တွေ စစ်ရေးလှုပ်ရှားနေတာပါ။

၎င်းတပ်ဖွဲ့နှစ်ခုဟာ ဒီနှစ်မေလပိုင်းမှာ တစ်ခုတည်းသောမွန်တပ်ဖွဲ့အဖြစ် ရာမညမွန်တပ်တော် (RMA) အဖြစ်ပေါင်းစည်းခဲ့ကာ ပူးတွဲစစ်ရေးလှုပ်ရှားနေပြီး အာဏာသိမ်းစစ်ကော်ရှင်တပ်ကို တိုက်ခိုက်နေတာပါ။

ဒါ့ပြင် ပြီးခဲ့တဲ့ရက်ပိုင်းမှာ မွန်တော်လှန်ရေးတပ်တွေအနေနဲ့ စစ်ရေးအရှိန်မြှင့်မှာဖြစ်ပြီး စစ်ကော်မရှင်က ကျင်းပဖို့စီစဉ်နေတဲ့ရွေးကောက်ပွဲကို ဆန့်ကျင်သွားမယ်လို့ ထုတ်ပြန်ထားပါသေးတယ်။

မနေ့က မွန်းလွဲသုံးနာရီခန့်မှာ ကန့်ဘလူမြို့နယ် ဇီးကုန်းမြို့မရဲစခန်းကို ကန့်ဘလူခရိုင် ပကဖရဲ့ အထူးလှုပ်ရှားတပ်ဖွဲ့က လျှပ်တပြက်ဝင်ရောက်စီးနင်းတိုက်ခိုက်ခဲ့ပြီး ရဲနဲ့ ပျူစောထီးတပ်ဖွဲ့ဝင် ခြောက်ဦးထက်မနည်းသေဆုံးသွားတယ်လို့ ဆိုပါတယ်။

ဒါ့အပြင် ရဲအရာရှိ နှစ်ဦးအပါအဝင် ခြောက်ဦးကိုလည်း လက်ရဖမ်းမိခဲ့ပြီး ၎င်းတို့ကိုင်ဆောင်တဲ့ G-3 သေနတ် ကိုးလက်၊ MA-1 တစ်လက် တို့ကိုလည်း သိမ်းဆည်းကာ ရဲစခန်းကို မီးရှို့ဖျက်ဆီးလိုက်တယ်လို့ ကန့်ဘလူ ပကဖက ရုပ်သံမှတ်တမ်းနဲ့တကွ ထုတ်ပြန်ပါတယ်။

ကန့်ဘလူမြို့နယ်ရဲ့ တောင်ပိုင်း၊ ရွှေဘို-မြစ်ကြီးနား ကားလမ်းအနောက်ဘက်နဲ့ မူးမြစ်ကမ်းရဲ့ အရှေ့ဘက်မှာတည်ရှိတဲ့ ဇီးကုန်းမြို့ဟာ အထွေထွေအုပ်ချုပ်ရေးဦးစီးဌာန၊ မြို့အုပ်ချုပ်ရေးမှူးရုံး၊ တိုက်နယ်ပြည်သူ့ဆေးရုံတွေ တည်ရှိတဲ့ မြို့ငယ်တစ်ခုပါ။

၎င်းကန့်ဘလူတောင်ပိုင်းဒေသတွေနဲ့ ရွှေဘို-မြစ်ကြီးနား ကားလမ်းတစ်လျှောက်မှာ စစ်ကိုင်းတိုင်းအခြေစိုက် တော်လှန်ရေးတပ်တွေရဲ့ လှုပ်ရှားနယ်မြေတွေ အများအပြားတည်ရှိတဲ့အပြင် အာဏာသိမ်းတပ်ကလည်း မြို့ပေါ်တွေနဲ့ ကျေးရွာတချို့မှာ တပ်စွဲထားတာပါ။

ပြီးခဲ့တဲ့ လပိုင်းတုန်းကတော့ စစ်ကော်မရှင်တပ်ဟာ ရွှေဘို-မြစ်ကြီးနား ကားလမ်းပိုင်းကို ပြန်လည်ထိန်းချုပ်ဖို့ ကန့်ဘလူမြို့နယ်ထဲမှာ စစ်ကြောင်းထိုးတာ လေကြောင်းကနေ တိုက်ခိုက်တာတွေ လုပ်ဆောင်ခဲ့ပြီး တော်လှန်ရေးတပ်တွေနဲ့ ထိတွေ့တိုက်ပွဲတွေလည်း ဖြစ်ပွားခဲ့ပါသေးတယ်။

ကန့်ဘလူတောင်ပိုင်းကို အာဏာသိမ်းတပ်က မကြာခဏ စစ်ကြောင်းထိုးပေမယ့် ဒေသတွင်းတော်လှန်ရေးတပ်တွေရဲ့ ပြောက်ကျားတိုက်ခိုက်မှုတွေကြောင့် ဒီနယ်မြေတွေကို ထိထိရောက်ရောက် စိုးမိုးနိုင်တာမရှိသေးဘူးလို့ ကန့်ဘလူက ဒေသခံ စစ်ဘေးရှောင်တချို့က ပြောပါတယ်။

ဒါ့ပြင် ၎င်းကန့်ဘလူမြို့နယ်တောင်ပိုင်းမှာ ဖြစ်ပွားနေတဲ့ တိုက်ပွဲတွေကြောင့် ပြီးခဲ့တဲ့နှစ်တွေထဲက နေရပ်မပြန်နိုင်သေးတဲ့ စစ်ဘေးရှောင်တွေလည်း ထောင်နဲ့ချီပြီး ရှိနေပါတယ်။

စစ်ကိုင်းတိုင်းအထက်ပိုင်းက အာဏာသိမ်းစစ်တပ်နဲ့ ရှမ်းနီအမျိုးသားများကာကွယ်ရေးတပ် (SNA) တပ်တွေ ပူးတွဲထိန်းချုပ်ထားတဲ့ ဗန်းမောက်မြို့ကို ပြီးခဲ့တဲ့နှစ်ရက်က တော်လှန်ရေးတပ်တွေက စတင်တိုက်ခိုက်နေတာပါ။

လက်ရှိတိုက်ပွဲဖြစ်နေတဲ့ ကာလအတွင်း တော်လှန်ရေးတပ်တွေကလည်း လမ်းတွေပိတ်ထားသလို၊ အင်တာနက်လိုင်းတွေကိုလည်း ပိတ်ပင်ထားပြီး အာဏာသိမ်းစစ်တပ်ကလည်း မြို့အဝင်အထွက်တွေကို ပိတ်ထားပါတယ်။

ဒီနေ့ထိ ဗန်းမောက်မြို့အဝင်လမ်းတွေမှာ တိုက်ပွဲတွေ ဆက်လက်ဖြစ်နေပြီး အာဏာသိမ်းစစ်တပ်နဲ့ ရှမ်းနီတပ်တွေရဲ့ ကာကင်းစခန်းတချို့ကို တော်လှန်ရေးတပ်တွေက သိမ်းယူနိုင်ခဲ့တယ်လို့ သတင်းတချို့မှာ ဖော်ပြပါတယ်။

လက်ရှိမှာ မြို့တွင်းရောက်ရှိနေတဲ့ မိသားစုဝင်တွေကို ဆက်သွယ်လို့မရဖြစ်နေပြီး မြို့တွင်းတိုက်ပွဲဖြစ်ပွားနေတဲ့ အခြေအနေတွေကိုလည်း မသိရှိရသေးတာကြောင့် ဒေသခံတချို့ဟာ ကျန်ရစ်နေတဲ့ မိသားစုဝင်တွေအတွက် စိုးရိမ်မှုတွေ ရှိနေကြပါတယ်။

“အဓိကတော့ အဲဒီမြို့ပြင်မှာ လေကြောင်းတိုက်ခိုက်မှုတွေ လုပ်လာရင် တားဆီးဖို့နဲ့ မြေပြင်တိုက်ပွဲသတင်းတွေ စိမ့်မထွက်အောင်ပေါ့။ အဓိကတော့ PDF နယ်မြေတွေအကုန်လုံး အင်တာနက်လိုင်းတွေ ပိတ်ထားတာပေါ့၊ ကြားတာတော့ ပြေးနေရတဲ့သူတွေရှိတယ်။ ပိတ်မိနေတဲ့သူတွေလည်းရှိတယ်” လို့ ဗန်းမောက်ဒေသခံတစ်ဦးက ပြောပါတယ်။

ဒါ့အပြင် ဗန်းမောက်မြို့ပေါ်မှာ ပိတ်မိနေတဲ့ ဒေသခံအရေအတွက် ၅,၀၀၀ ကျော်ခန့်ရှိနိုင်တယ်လို့လည်း ဒေသခံတချို့က ခန့်မှန်းထားပါတယ်။

"အဓိကတော့ တော်လှန်ရေးတပ်တွေ စိုးမိုးထားတဲ့ ရွာတွေအကုန် ပိတ်ထားတာပါ။ မြို့တွင်းမှာတော့ လူဦးရေ ငါးထောင်ကျော်လောက်ရှိမယ်ထင်တယ်” လို့ ဗန်းမောက်ဒေသခံတစ်ဦးက ပြောပါတယ်။

ဗန်းမောက်မြို့သိမ်းတိုက်ပွဲစတင်ခဲ့တဲ့ ပြီးခဲ့တဲ့နှစ်ရက်ကစပြီး ဗန်းမောက် ပြည်သူ့အုပ်ချုပ်ရေးအဖွဲ့ (ပအဖ) က ဗန်းမောက်မြို့နယ်အတွင်း တော်လှန်‌ရေး အင်အားစုတွေ ထိန်းချုပ်ထားတဲ့ နယ်မြေတွေမှာ အင်တာနက်တွေကို အကန့်အသတ်မရှိ လုံခြုံရေးအရ ပိတ်ပင်လိုက်တယ်လို့ ထုတ်ပြန်ထားပါတယ်။

တော်လှန်ရေးတပ်တွေ စိုးမိုးလာပြီးနောက် အာဏာသိမ်းစစ်တပ်က ဖုန်းလိုင်းတွေ ဖြတ်တောက်ထားတဲ့ ဒီဒေသမှာ စီးပွားရေးအရ ဝိုင်ဖိုင်၊ အင်တာနက်ဆိုင်တွေ ဖွင့်လှစ်ထားတာတွေကို အဓိကထားပိတ်ပင်လိုက်တာပါ။

ဒါအပြင် ဗန်းမောက်မြို့ကို ဆက်သွယ်ထားတဲ့ အဓိကကားလမ်းဖြစ်တဲ့ အင်းတော်-ဗန်းမောက်ကားလမ်းအပါအဝင် တခြားလမ်းပိုင်းတွေအားလုံးကိုလည်း ရက်အကန့်အသတ်မရှိ ပိတ်ပင်ထားပါတယ်။

ကချင်ပြည်နယ်နဲ့ စစ်ကိုင်းတိုင်းအထက်ပိုင်းရဲ့ ဝင်ပေါက်လမ်းကြောင်းတစ်ခုပေါ်မှာရှိတဲ့ ဗန်းမောက်မြို့ကို ကချင်လွတ်လပ်ရေး တပ်မတော် (KIA) နဲ့ တော်လှန်ရေးတပ်တွေက မြို့သိမ်းနိုင်ဖို့ အင်အားအလုံးအရင်းနဲ့ ထိုးစစ်ဆင်ခဲ့တာပါ။

တိုက်ပွဲတွေကြောင့် ဗန်းမောက်မြို့ အနောက်ဘက်ခြမ်းက မံလူကျေးရွာအုပ်စုအတွင်း ကျေးရွာတချို့ မီးလောင်ပျက်စီးနေတဲ့ ရုပ်သံဖိုင်တချို့လည်း လူမှုကွန်ရက်မှာ ပျံ့နှံ့နေပါတယ်။

တော်လှန်ရေးတပ်တွေဟာ ဗန်းမောက်နဲ့ ဆက်သွယ်ထားတဲ့ ရွှေဘို-မြစ်ကြီးနား ကားလမ်းပေါ်က အင်းတော်မြို့အပါအဝင် စစ်ကိုင်းတိုင်းအထက်ပိုင်းက ပင်လည်ဘူး၊ ဖောင်းပြင်၊ ရွှေပြည်အေးမြို့တွေကိုလည်း ထိန်းချုပ်ထားပါတယ်။

" အိမ်ကတော့ ဘာမှမကျန်ဘူး၊ လူမနေလို့တော်သေးတယ်၊ လူသာနေရင် အလောင်းတောင်ရှာရမှာမဟုတ်ဘူး၊ ထပ်ဆောက်ဖို့ဆိုတာကအခုကာလနဲ့လည်းမလွယ်ဘူး၊ အိမ်ကလူတွေကပထမတစ်ခါကြဲ ပြီးကတည်းက တခြားမှာရှောင်နေကြလို့ လူမထိတာ"လို့ ဗုံးကြဲခံရတဲ့နေအိမ်ကမိသားစုဝင်တစ်ဦးကပြောပါတယ်။

အာဏာသိမ်းစစ်တပ်က အုန်းကိုင်းရပ်ကွက်၊ လင်းရောင်ခြည်ဘုန်းကြီးကျောင်းအောက်ကို ပေါင် ၂၅၀ ဗုံး နှစ်လုံး လာရောက်ကြဲခဲ့တာကြောင့် ပြည်သူတစ်ဦး မစိုးရိမ်ရထိခိုက်ဒဏ်ရာရခဲ့ပြီး နေအိမ် ငါးလုံးထိခိုက်ပျက်စီးခဲ့တယ်လို့ TNLA ကထုတ်ပြန်ထားပါတယ်။

" ဗုံးကြဲခံရတဲ့နားမှာ "ဝ" လုပ်ငန်းရှင်တွေရဲ့ကျောက်တွင်းရှိတယ်၊ ပထမတခါကြဲတုံးက ဘုန်းကြီးကျောင်း​​ အပေါ်ဘက်ကျတာ၊ ခုကအောက်ဘက်ကျတာ၊ တွင်းကိုကြဲချင်တာထင်တယ်"လို့ လင်းရောင်ခြည် ဘုန်းကြီး ကျောင်းအနီးနေထိုင်သူတစ်ဦးကပြောပါတယ်။

မိုးကုတ်မြို့မှာ လေကြောင်းကာကွယ်ရေးအတွက် အာဏာသိမ်းစစ်တပ်ရဲ့ ဂျက်ဖိုက်တာနဲ့လေယာဥ်တွေ မိုးကုတ်ဘက်ကိုဦးတည်လာရင် မြို့တွင်းကလူတွေကိုသတိပေးဖို့ လော်စပီကာတွေနဲ့ ကြိုတင်သတိပေးတဲ့စနစ်ကိုအသုံးပြုနေတယ်လိို့မြို့ခံတွေကပြောပါတယ်။

မိုးကုတ်မြို့ လင်းရောင်ခြည် ဘုန်းကြီးကျောင်းအနီး နဲ့ ငါးပတ်တောင်ကို အာဏာသိမ်းစစ်တပ်က သြဂုတ် ၁၄ရက်၊ ညပိုင်းမှာလေကြောင်းဗုံးကြဲခဲ့တာကြောင့် ပြည်သူ ၂၂ ဦးထိခိုက်သေဆုံးခဲ့ရပါတယ်။

မိုးကုတ်မြို့ကို အာဏာသိမ်းစစ်တပ်က ဇူလိုင်နဲ့ သြဂုတ်အတွင်း ဗုံးရှစ်ကြိမ်ကြဲချခဲ့တာကြောင့် ပြည်သူ ၆၀ ဦးထက်မနည်းထိခိုက်သေဆုံးခဲ့ရပါတယ်။

ပြီးခဲ့တဲ့နှစ်ရက်က ဗန်းမောက်-အင်းတော် ဆက်သွယ်ထားတဲ့ကားလမ်းကို တော်လှန်ရေးတပ်တွေက အကန့်အသတ်မရှိပိတ်လိုက်ကြောင်း ကြေညာခဲ့ပြီးနောက် ဗန်းမောက်မြို့အဝင်က စစ်ကော်မရှင်တပ်တွေ တပ်စွဲထားတဲ့ ကာကင်းစခန်းတွေကို တော်လှန်ရေးတပ်တွေက ဝင်ရောက်တိုက်ခိုက်ခဲ့တာပါ။

စစ်ကော်မရှင်တပ်ဘက်က မြို့ရဲ့ ကာကင်းစခန်းတချို့ လက်လွှတ်လိုက်ရတဲ့ သတင်းတွေလည်း ထွက်ပေါ်နေပြီး စစ်ကော်မရှင်တပ်ဘက်က လေကြောင်းကနေလည်း ဆက်တိုက်ပစ်ခတ်နေတယ်လို့ ဗန်းမောက်ဒေသခံတစ်ဦးကပြောပါတယ်။

လက်ရှိမှာ တော်လှန်ရေးတပ်တွေဘက်က ဗန်းမောက်-အင်းတော်ကားလမ်းကို ပိတ်ထားသလို စစ်ကော်မရှင်တပ်ကလည်း ဗန်းမောက်မြို့အဝင်အထွက်တွေကို ပိတ်ထားလိုက်ပြီး မြို့တွင်းမှာ ပိတ်မိနေတဲ့ ဒေသခံတွေအများအပြားရှိနေသေးတာပါ။

“KIA နဲ့ PDF တွေက အင်းတော်-ဗန်းမောက်လမ်းတစ်ခုလုံး အရင်ကတည်းက ထိန်းချုပ်ထားတာ။ အဲဒီလမ်းမှာ သူတို့ဂိတ်တွေပဲ။ ဗန်းမောက်ကို အရင်ထဲက ပိတ်ဆို့ထားပြီးသားလို့ ပြောလို့ရတယ်။ မြို့သိမ်းတိုက်ပွဲဖြစ်တော့မယ်ဆိုပြီး သတင်းထွက်နေတာလည်း သုံးလေးရက်ရှိပြီပေါ့။ အခုတော့ တိုက်ပွဲတွေတော့ စဖြစ်နေပြီပေါ့” လို့ ဗန်းမောက်ဒေသခံတစ်ဦးက ပြောပါတယ်။

စစ်ကိုင်းတိုင်းအထက်ပိုင်း ကသာခရိုင်အတွင်းမှာရှိတဲ့ ဗန်းမောက်မြို့ဟာ ရှမ်းနီလူမျိုးအများစုနေထိုင်ပြီး၊ ကဒူး၊ ကနန်းမျိုးနွယ်စုတွေ နေထိုင်ကြတာပါ။

ဒါ့အပြင် ဒီမြို့မှာ ရွှေတူးဖော်ရေးလုပ်ငန်းတွေနဲ့ သတ္တုတူးဖော်ရေးလုပ်ငန်းတွေလည်းအများအပြားရှိပြီး စစ်ကော်မရှင်နဲ့ ပူးပေါင်းနေတဲ့ ဒေသတွင်း ရှမ်းနီလက်နက်ကိုင်အဖွဲ့ SNA တပ်တွေ ထိန်းချုပ်ထားတာပါ။

“မြို့က လူဦးရေကတော့ သိပ်မရှိဘူး။ အဓိကတော့ ရွှေလုပ်ကွက်တွေပဲ။ လူဦးရေက တစ်မြို့မှ သောင်းဂဏန်းလောက်တော့ရှိမယ်။ အိမ်ခြေလည်းသိပ်တော့မများဘူး” လို့ ဗန်းမောက်ဒေသခံတစ်ဦးက ပြောပါတယ်။

လက်ရှိမှာ တော်လှန်ရေးပူးပေါင်းတပ်တွေက ဗန်းမောက်မြို့ရဲ့ အရှေ့ခြမ်းနဲ့ တောင်ဘက်ခြမ်းတွေကို ထိန်းချုပ်ထားပြီး မြို့ပေါ်နဲ့ ကျန်နေရာတွေကိုတော့ SNA တပ်တွေ ထိန်းချုပ်ထားတယ်လို့ ဒေသခံတချို့က ပြောပါတယ်။

ဒါ့အပြင် တော်လှန်ရေးတပ်တွေဟာ ဗန်းမောက်နဲ့ ဆက်သွယ်ထားတဲ့ ရွှေဘို-မြစ်ကြီးနား ကားလမ်းပေါ်က အင်းတော်နဲ့ ထီးချိုင့်မြို့တွေကိုလည်း သိမ်းယူထားတာပါ။

ဒီနေ့မနက် ၆ နာရီခန့်က မဟာဗန္ဓုလပန်းခြံအရှေ့ ဆူးလေဘုရားအနီး ဗုံးပေါက်ခဲ့တာဖြစ်ပြီး ထိခိုက်မှုသေဆုံးမှုတွေတော့ မရှိခဲ့ဘူးလို့ ဆူးလေအနီး ဈေးရောင်းချတဲ့ဈေးသည်တစ်ဦးက ပြောပါတယ်။

ဗုံးပေါက်ကွဲပြီးနောက်ပိုင်း စစ်ကော်မရှင်တပ်ဖွဲ့ဝင်တွေ ဆူးလေဘုရားအနီးနဲ့ မြို့တော်ခန်းမအရှေ့တွေမှာ စစ်ကားတွေနဲ့ လှည့်လည်ကင်းပတ်နေတာတာတွေ ပြုလုပ်နေတယ်လို့ ၎င်းဈေးသည်က ပြောပါတယ်။

“ထိခိုက်တာတော့ မကြားမိဘူး။ ဗုံးပေါက်တာ ဆူးလေဘုရားဘက် ပလက်ဖောင်းနားမှာထင်တယ်။ အဲဒီမှာ စစ်ကားတစ်စီးရပ်ထားတယ်။ စည်ပင်တွေလည်း မနက်တည်းက ဈေးသည်တွေကို အကုန်လိုက်ဖမ်းနေလို့ ဈေးမရောင်းရဘူး” လို့ ၎င်းက ပြောပါတယ်။

ဒီတိုက်ခိုက်မှုနဲ့ ပတ်သက်လို့ ရန်ကုန်မြို့ပြပြောက်ကျားအဖွဲ့တစ်ခုဖြစ်တဲ့ Freeland Attack Force က စစ်ကော်မရှင်အလိုကျ ပြုမူဆောင်ရွက်နေတဲ့ မြို့တော်ခန်းမကို ဗုံးနဲ့ ဖောက်ခွဲတိုက်ခိုက်ခဲ့တယ်လို့ ထုတ်ပြန်ထားပါတယ်။

“မစ်ရှင်ရဲဘော်များအနေဖြင့် ပစ်မှတ်မြို့နယ်မှ ဘေးကင်းစွာဆုတ်ခွာနိုင်ခဲ့ပြီး ရန်သူ့အခြေအနေ အသေးစိတ်အား မသိရှိရသေးပေ။ ဗုံးပေါက်ကွဲမှုအပြီး အကြမ်းဖက်စစ်ကောင်စီဘက်မှ ပိတ်ဆို့ရှာဖွေစစ်ဆေးမှုများ လုပ်ဆောင်ခဲ့သည်” လို့ Freeland Attack Force ရဲ့ ထုတ်ပြန်ချက်မှာ ဖော်ပြပါတယ်။

ရန်ကုန်မြို့လယ်ခေါင်မှာတည်ရှိတဲ့ မြို့တော်ခန်းမဟာ အတားအဆီးတွေအကာအရံတွေနဲ့ လုံခြုံရေးအထူးတင်းကျပ်ထားတဲ့ နေရာတစ်ခုပါ။

Freeland Attack Force မြို့ပြပြောက်ကျားအဖွဲ့ဟာ ဇွန်လပိုင်းတုန်းကလည်း သာကေတမြို့နယ် ဥပဒေရုံးကို ဗုံးဖောက်တိုက်ခိုက်မှု နောက်ဆုံးပြုလုပ်ထားတဲ့ အဖွဲ့တစ်ခုပါ။

ရန်ကုန်မြို့မှာ ဒီနှစ်ဆန်းပိုင်းကစပြီး စစ်ကော်မရှင်တပ်က တင်းတင်းကျပ်ကျပ် စစ်ဆေးလာတာကြောင့် မြို့ပြပြောက်ကျားအဖွဲ့ဝင်တွေ ဖမ်းဆီးခံရတာတွေရှိလာပြီး မြို့ပေါ် ပြောက်ကျားတိုက်ခိုက်မှုတွေ မရှိသလောက် နည်းသွားရာကနေ အခုတစ်ခါပြန်လည်တိုက်ခိုက်လာတာပါ။

ပြီးခဲ့တဲ့လနဲ့ ဒီလဆန်းပိုင်းမှာ စစ်ကော်မရှင်တပ်ဟာ အနောက်မြောက်တိုင်းစစ်ဌာနချုပ် အခြေပြုတဲ့ မုံရွာမြို့ကနေ ဘုတလင်နယ်ထဲကို မုံရွာ-ဘုတလင်လမ်းပိုင်းအတိုင်း နယ်မြေရှင်းလင်းဖို့အတွက် အင်အား ၃၀၀ ခန့်နဲ့ စစ်ကြောင်းထိုးလာတာပါ။

၎င်းစစ်ကြောင်းကို ပြီးခဲ့တဲ့လ ၃၁ ရက်က ဘုတင်လင်မြို့နယ် ကံသာရွာအနီးမှာ တော်လှန်ရေးမဟာမိတ်တပ်တွေက ဒရုန်းနဲ့ နှစ်ကြိမ်ဗုံးကြဲတိုက်ခိုက်ပြီး နှစ်ဖက်ထိတွေ့တိုက်ပွဲတွေ ဖြစ်ခဲ့တယ်လို့ဆိုပါတယ်။

ဒါ့အပြင် ၎င်းညနေပိုင်းမှာပဲ ကုန်းသာရွာအနီးမှာ နှစ်ကြိမ်မိုင်းဆွဲတိုက်ခိုက်ခဲ့ပြီး စစ်ကော်မရှင်တပ်ဘက်က ခန့်မှန်း ၄၀ ဦး သေဆုံးခဲ့တယ်လို့ ကျောင်းသားလက်ရုံးတပ်ဖွဲ့ရဲ့ ထုတ်ပြန်ချက်မှာ ဖော်ပြပါတယ်။

လက်ရှိမှာ ၎င်းစစ်ကော်မရှင်စစ်ကြောင်းဟာ မုံရွာ-ဘုတလင်ကားလမ်းအနီးက အနောက်ဇီးတောရွာ၊ ရွှေတောင်ရွာ၊ ကံသာရွာနဲ့ ထူးကြီးရွာ တို့က နေအိမ်တချို့ကို မီးရှို့ခဲ့ပြီး ပြီးခဲ့တဲ့ရက်ပိုင်းမှာတော့ ဘုတလင်ကနေ မုံရွာမြို့က အနောက်မြောက်တိုင်းစစ်ဌာနချုပ်အတွင်းကို ပြန်လည်ဝင်ရောက်သွားတယ်လို့ ဆိုပါတယ်။

၎င်းတိုက်ခိုက်မှုတွေကို ကျောင်းသားလက်ရုံးတပ်တော် (SAF) နဲ့အတူ ဘုတလင်မိုဘိုင်းအဖွဲ့ (Budalin Mobile Team)၊ Anonymous Hero၊ ရတနာပုံတော်လှန်ရေးအဖွဲ့ (YRF)၊ ဗမာ့တပ်တော် အမှတ် (၂) စစ်ဦးစီးရုံးကွပ်ကဲမှုအောက် အမှတ် (၅၀၅) တပ်ရင်း၊ ရွာဇော်ကြီးတော်လှန်အသံ (သတင်းနှင့်တိုက်ခိုက်ရေးအဖွဲ့ )၊ မုံရွာခရိုင်တပ်ရင်း (၁၈)၊ ဘုတလင်မြိူ့နယ် ပကဖနဲ့ မုံရွာမြို့နယ် ပလဖတို့ ပူးပေါင်းပါ၀င်ခဲ့တာပါ။

တော်လှန်ရေးတပ်တွေ အားကောင်းတဲ့ ဘုတလင်မြို့နယ်မှာ စစ်ကော်မရှင်တပ်တွေ မကြာခဏ စစ်ကြောင်းထိုးဝင်ရောက်တာတွေ၊ ကျေးရွာတွေကို မီးရှို့တာတွေရှိနေပြီး ဒေသခံတွေဟာ မကြာခဏ အရေးပေါ် စစ်ဘေးရှောင်နေကြရပါတယ်။

စစ်ကော်မရှင်တပ်ဟာ တော်လှန်ရေးတပ်ဖွဲ့တွေဆီကို လက်လွှတ်ထားရတဲ့ စစ်ကိုင်းတိုင်းအထက်ပိုင်းထဲက မုံရွာ-ဘုတလင် လမ်း၊ မုံရွာ-အရာတော်၊ မုံရွာ-ရွှေဘို လမ်းပိုင်းတွေကို ပြီးခဲ့တဲ့လပိုင်းတွေမှာ စစ်ကြောင်းထိုးကာ နယ်မြေစိုးမိုးမှု ပြန်လည်ရယူဖို့ လုပ်ဆောင်လာတာပါ။

စစ်ကော်မရှင်အနေနဲ့ စစ်ကိုင်းတိုင်းထဲမှာ ရွေးကောက်ပွဲကာလအတွင်း နယ်မြေစိုးမိုးမှု ရယူထားဖို့နဲ့ တော်လှန်ရေးတပ်တွေရဲ့ ထောက်ပို့လမ်းကြောင်းတွေ စိုးမိုးဒေသတွေကို ဖြတ်တောက်ပိတ်ဆို့ဖို့ အခုလို စစ်ကြောင်းတွေ ဆက်တိုက်ပို့လွှတ်နေတယ်လို့ ဒေသတွင်းတော်လှန်ရေးတပ်တွေက အသိပေးထားပါတယ်။

စစ်ကော်မရှင်တပ်ဟာ ဂုတ်ထိပ်လမ်းပိုင်းကို ပြီးခဲ့တဲ့လပိုင်းမှာ ထိန်းချုပ်လိုက်ပြီး နောင်ချို-နောင်ပိန်-ကျောက်မဲ ကားလမ်းအတိုင်း ကျောက်မဲမြို့ဘက်ကို အင်အားအလုံးအရင်းနဲ့ ပို့လွှတ်နေတာပါ။

ဒီလမ်းပိုင်းက နားအိုက်ခန့်၊ ပန်ဟိုက်နဲ့ ခိုက်တုန်ဟုန်းရွာတွေမှာ မနေ့စပြီး တိုက်ပွဲတွေပြင်းထန်ခဲ့ကာ လေကြောင်းကနေ ဗုံးကြဲတိုက်ခိုက်တာတွေလည်း ရှိခဲ့တယ်လို့ ကျောက်မဲစစ်ဘေးရှောင်တစ်ဦးက ပြောပါတယ်။

“ကျောက်မဲမဝင်ခင် အဲဒီလမ်းတစ်လျှောက် TNLA ထိန်းထားတဲ့ ရွာတွေအများကြီးရှိသေးတယ်။ အဲဒီရွာတွေကို အပြင်ကနေ လက်နက်ကြီးတွေ၊ ဗုံးကြဲတာတွေ ဆက်တိုက်လုပ်လာတယ်။ ပြီးမှ မြေပြင်စစ်ကြောင်းလည်း ဝင်လာမယ့်ပုံစံရှိတယ်။ TNLA ကလည်း ခံစစ်ပြင်ထားတော့ ကျောက်မဲ တိုက်ပွဲကတော့ ဆက်ဖြစ်နေတယ်။ ပြင်းထန်လာမယ့်အခြေအနေရှိတယ်” လို့ ၎င်းဒေသခံက ပြောပါတယ်။

ဒါ့အပြင် ဒီလမ်းပိုင်းက ကျေးရွာပေါင်း ၁၀ ရွာထက်မနည်းက ဒေသခံထောင်နဲ့ချီပြီး သီပေါနဲ့လားရှိုးမြို့တွေကို စစ်ဘေးရှောင်နေကြရပါတယ်။

ရှမ်းမြောက်က အဓိက တရုတ်နယ်စပ်ကုန်သွယ်ရေးလမ်းကြောင်းတစ်ခုဖြစ်တဲ့ မူဆယ်-မန္တလေး ကားလမ်းပြန်ဖွင့်နိုင်ဖို့ စစ်ကော်မရှင်တပ်ဘက်က အင်အားသုံးကာ ထိုးစစ်ဆင်နေပြီး ဒီလမ်းပိုင်းမှာ အဓိကျတဲ့ ကျောက်မဲ၊ သီပေါမြို့တွေကို ပြန်ထိန်းချုပ်ဖို့ စစ်ကော်မရှင်ဘက်က လုပ်ဆောင်နေတာလို့ စစ်ရေးလေ့လာသူတချို့က သုံးသပ်ပါတယ်။

လက်ရှိမှာ စစ်ကော်မရှင်တပ်ဟာ ကျောက်မဲစစ်မျက်နှာကို တောင်ခမ်းနဲ့ နောင်ချိုမြို့တွေက လက်ကျန်တပ်တွေအပါအဝင် တပ်ရင်း ၂၀ နီးပါးထိ အင်အားတွေပို့လွှတ်ထားပြီး နောင်ပိန်ရွာအနီးထိ လက်နက်ကြီးတပ်တွေကို နေရာချထားပြီး ထိုးစစ်ဆင်လာတယ်လို့ စစ်ရေးလေ့လာသူ CDM အရာရှိ ဗိုလ်ကြီးဇင်ယော်က သုံးသပ်ပါတယ်။

“အကြမ်းဖက်တပ်ဘက်က ဒရုန်းတွေနဲ့ စိုးမိုးထားနိုင်တဲ့ အခြေအနေရှိတဲ့အပြင် လေကြောင်း‌အရေးသာမှုရယူကာ တိုက်ပွဲအခြေအနေကို ပြောင်းလဲဖို့ ကြိုးစားလာခဲ့တာကို တွေ့ရပါတယ်” လို့ ကျောက်မဲစစ်မျက်နှာအခြေအနေနဲ့ ပတ်သက်ပြီး ၎င်းကသုံးသပ်ထားပါတယ်။

ပြီးခဲ့တဲ့လပိုင်းကစပြီး TNLA ထိန်းချုပ်ထားတဲ့ ကျောက်မဲနဲ့ သီပေါမြို့တွေကို ဗုံးကြဲတာတွေနဲ့ တိုက်ပွဲတွေကြောင့် ထွက်ပြေးတိမ်းရှောင်နေရတဲ့ ဒေသခံဦးရေ ရှစ်ထောင်ထိရှိလာတယ်လို့ ဒေသတွင်း အချက်အလက်ကောက်ယူရေးအဖွဲ့တွေက အသိပေးထားပါတယ်။

ဩဂုတ်လ ၁၈ ရက်ကနေ ၃၀ ရက်အတွင်း ကျောက်မဲမြို့နယ်မှာ စစ်ကော်မရှင်တပ်ရဲ့ လေကြောင်းနဲ့ မြေပြင်မှပစ်ခတ်တိုက်ခိုက်မှုတွေကြောင့် အရပ်သားပြည်သူ ၂၉ ဦးသေဆုံးခဲ့တယ်လို့ ဒေသတွင်းအချက်အလက်ကောက်ယူရေးအဖွဲ့ ရှမ်းအလူ့အခွင့်ရေးမဏ္ဍိုင်က ထုတ်ပြန်ထားပါတယ်။

ဒီနေ့မနက် အစောပိုင်း ၁း၀၀ နာရီခန့်က ကျောက်တော်မြို့နယ်၊ သရက်တပင်ကျေးရွာက ပညာပန်းခင်း ကိုယ်ပိုင်အထက်တန်းကျောင်းအနီးကို စစ်ကောင်မရှင်က လေကြောင်းကနေ ပေါင် ၅၀၀ ဗုံးနှစ်လုံး ကြဲချတိုက်ခိုက်ခဲ့တာပါ။

ဒီတိုက်ခိုက်မှုကြောင့် ပညာပန်းခင်း၊ ကိုယ်ပိုင်အထက်တန်းကျောင်းက ကျောင်းသူကျောင်းသားတွေနဲ့ ၎င်းပတ်ဝန်းကျင်က ကလေးငယ်တချို့အပါအဝင် စုစုပေါင်း (၁၈) ဦး သေဆုံးကာ (၂၀) ကျော် ပြင်းထန်ဒဏ်ရာရရှိခဲ့ကြတယ်လို့ AA ရဲ့ ထုတ်ပြန်ချက်မှာ ဖော်ပြပါတယ်။

အာဏာသိမ်းစစ်တပ်ဟာ ရခိုင်ပြည်နယ်က AA ထိန်းချုပ်ထားတဲ့ မြို့ရွာတွေကို ဗုံးကြဲတိုက်ခိုက်မှုတွေကို ဆက်တိုက်လုပ်ဆောင်လာနေပြီး အရပ်သားထိခိုက်သေဆုံးမှုတွေလည်း တိုးလာနေပါတယ်။

ပြီးခဲ့တဲ့လ ၂၅ ရက် ညပိုင်းကလည်း မြောက်ဦးမြို့ပေါ်က ဒိုင်းကျီရပ်ကွက်ကို အာဏာသိမ်းစစ်တပ်က ဂျက်ဖိုက်တာနဲ့ လေကြောင်းတိုက်ခိုက်ခဲ့တာကြောင့် ဒေသခံ ၁၄ ဦးသေဆုံခဲ့ပြီး ၂၀ ဦးကျော် ထိခိုက်ဒဏ်ရာရခဲ့ပါတယ်။

မေလပိုင်းကလည်း ကျောက်တော်မြို့ ရွာမရပ်ကွက်ကို အာဏာသိမ်းစစ်တပ်က နှစ်ရက်ဆက် ဗုံးကြဲတိုက်ခိုက်ရာမှာ ဒေသခံ ရှစ်ဦးထိ သေဆုံးခဲ့ပါသေးတယ်။

အာရက္ခတပ်တော် (AA) ဟာ ၂၀၂၃ နိုဝင်ဘာလပိုင်းကစပြီး ရခိုင်ပြည်နယ်က အာဏာသိမ်းစစ်အုပ်စုရဲ့ တပ်စခန်းတွေကို စတင်ထိုးစစ်ဆင်တိုက်ခိုက်ခဲ့ပြီး တစ်နှစ်ခွဲကျော်ကာလအတွင်း ရခိုင်ပြည်နယ်က စစ်တွေ၊ ကျောက်ဖြူနဲ့ မာန်အောင်မြို့တွေကလွဲရင် ပြည်နယ်တစ်ခုလုံးနီးပါးကို ထိန်းချုပ်ထားတာပါ။

ဒါအပြင် ပြီးခဲ့တဲ့လပိုင်းတွေကစပြီး AA တပ်တွေဟာ တရုတ်နိုင်ငံရဲ့ ရင်းနှီးမြုပ်နှံမှု စီမံကိန်းတွေရှိတဲ့ ကျောက်ဖြူမြို့နယ်မှာလည်း စစ်ရေးဖော်ဆောင်လာပြီး နှစ်ဘက်တိုက်ပွဲတွေ ဖြစ်နေတာပါ။

မနေ့ကစပြီး ရွှေဈေးဟာ တစ်ကျပ်သားကို ၇၉ သိန်းကျော်ကို စတင်ရောက်ရှိခဲ့ပြီး ဒီနေ့မှာလည်း ၇၉ သိန်း ခုနစ်သောင်းဝန်းကျင်ထိကို ဈေးကွက်အတွင်း ဖွင့်လှစ်ထားတာပါ။

ပြီးခဲ့တဲ့ လနောက်ဆုံးပတ်ကစပြီး ပြည်တွင်းအခေါက်ရွှေဈေးဟာ တစ်ကျပ်သားကို ကျပ် ၇၅ သိန်းဝန်းကျင်ကနေ တဖြည်းဖြည်းနဲ့ ပြန်လည်မြင့်တက်ပြီး ဒီလဆန်းပိုင်းမှာလည်း ဆက်လက်ပြီးမြင့်တက်လာတာပါ။

လက်ရှိမှာ ကမ္ဘာ့ရွှေဈေးကလည်း စံချိန်တင်အမြင့်ဆုံးကို ရောက်ရှိနေပြီး ပြည်တွင်းရွှေဈေးလည်း လိုက်ပါမြင့်တက်လာတယ်လို့ ဈေးကွက်လေ့လာစောင့်ကြည့်သူတချို့က ပြောပါတယ်။

အမေရိကန်ဒေါ်လာထက် ပိုပြီးစိတ်ချရတဲ့ ရွှေကို ဝယ်ယူစုဆောင်းသူတွေ များလာတဲ့အတွက် အခုလို ကမ္ဘာ့ရွှေဈေးဟာ မြင့်တက်လာတယ်လို့ ဈေးကွက်လေ့လာစောင့်ကြည့်သူ တချို့က သုံးသပ်ပါတယ်.

“ရွှေဈေးက ဒီမှာပဲ တက်နေတာမဟုတ်ဘူး။ ကမ္ဘာ့ရွှေရော၊ ထိုင်းရွှေဈေးရော အကုန်တက်တယ်။ ရွှေကို ရင်းနှီးမြှပ်နှံမှုတွေ ပိုပြီးများလာတယ်။ ကမ္ဘာ့ရွှေဈေးက သမိုင်းတစ်လျှောက်ကို အမြင့်စံချိန်တွေချိုးပြီး ဆက်တိုက်တက်နေတယ်” လို့ ရွှေနဲ့ ငွေကြေးဈေးကွက်ကို လေ့လာသူတစ်ဦးက ပြောပါတယ်။

ပြီးခဲ့တဲ့နှစ်က တစ်အောင်စကို ဒေါ်လာ ၃,၀၀၀ ကျော်စွန်းစွန်းမှာပဲရှိခဲ့တဲ့ ကမ္ဘာ့ရွှေဈေးဟာ လက်ရှိမှာ တစ်အောင်စကို ဒေါ်လာ ၃,၆၀၀ ကျော်ထိ ရောက်နေတာပါ။

ဒီနှစ် ဇွန်ပိုင်းကလည်း ပြည်တွင်းရွှေဈေးနှုန်းဟာ တစ်ကျပ်သားကို ကျပ်သိန်း ၈၀ ကျော်ကို ရောက်ရှိခဲ့ပြီး စစ်တပ်ဘက်က ရွှေဆိုင်တွေကို လိုက်လံဖမ်းဆီးစစ်ဆေးတာ၊ ရွှေအရောင်းအဝယ်ဈေးကွက်တွေကို ပိတ်ပင်ခဲ့တာတွေကြောင့် ရွှေဈေးအနည်းငယ်ပြန်ကျဆင်းခဲ့သွားပါတယ်။

ပြည်တွင်းရွှေဈေးရဲ့ အမှန်တကယ်အရောင်းအဝယ်လုပ်နေတဲ့ ဈေးကွက်ပေါက်ဈေးဟာ တစ်ကျပ်သားကို သိန်း ၈၀ ဝန်းကျင်ရှိလာပေမယ့် စစ်တပ်လက်အောက်ခံ ရန်ကုန်တိုင်းရွှေလုပ်ငန်းရှင်အသင်းကတော့ ရည်ညွှန်းရောင်းဈေးကို တစ်ကျပ်သားကို ၅၉ သိန်းဝန်းကျင်ပဲ သတ်မှတ်ထားပြီး ရည်ညွှန်းဈေးနဲ့ ဈေးကွက်ပေါက်ဈေးက သိန်း ၂၀ ကျော်ထိ ကွာဟနေပါတယ်။

အာဏာသိမ်းစစ်တပ်ဟာ စစ်သင်တန်းဆင်း တပ်သားသစ်တွေနဲ့ စုဖွဲ့ထားတဲ့ တပ်ရင်းတွေစုပေါင်းကာ ဒီလဆန်းပိုင်းမှာ ရခိုင်ရိုးမနဲ့ ထိစပ်နေတဲ့ မကွေးတိုင်း၊ ဧရာဝတီတိုင်းတို့က ၎င်းတို့ စွန့်လွှတ်ထားခဲ့ရတဲ့ နယ်မြေတွေကို ထိုးစစ်ဆင်လာနေပြီး တိုက်ပွဲတွေ ပြင်းထန်နေတယ်လို့ AA က ထုတ်ပြန်ပါတယ်။

ရခိုင်ပြည်နယ်နဲ့ မကွေးတိုင်းအစပ် အမ်း-မင်းဘူး ကားလမ်းအနီးက ငဖဲမြို့နယ် စွန်တက်ရွာအနီးကို အာဏာသိမ်းစစ်တပ်က ထိုးစစ်ဆင်ခဲ့ပြီး အာရက္ခတပ်တော် (AA) ရဲ့ တိုက်ခိုက်မှုကြောင့် ထိခိုက်သေဆုံးမှုများခဲ့တယ်လို့ ဆိုပါတယ်။

ဒီလ ၇ ရက်နေ့မှာ ငဖဲမြို့နယ်၊ စွန်တက်ရွာအနီးကို အာဏာသိမ်းစစ်တပ်က စစ်ကြောင်းနှစ်ကြိမ်ထိုးလာပြီး AA တပ်ရဲ့ ခုခံစစ်နဲ့ တန်ပြန်ထိုးစစ်ကြောင့် အထိနာပြီး အထိအခိုက်အကျအဆုံးများစွာနဲ့ ဆုတ်ခွာခဲ့ရတယ်လို့ ဆိုပါတယ်။

အာဏာသိမ်းစစ်တပ်ရဲ့ စစ်ကြောင်းနဲ့ AA တပ်တွေအကြား စွန်တက်ရွာအနီး ရှစ်နာရီနဲ့ သုံးနာရီကျော်ကြာတဲ့ တိုက်ပွဲနှစ်ကြိမ်ဖြစ်ပွားခဲ့ပြီး အာဏာသိမ်းစစ်တပ်ဘက်က အလောင်း ၆၀ ကျော်နဲ့ စစ်အသုံးပစ္စည်းတွေ လက်နက်ခဲယမ်းတွေကို AA တပ်တွေသိမ်းဆည်းရမိခဲ့တာပါ။

လက်ရှိမှာ ကစဉ့်ကလျား ဆုတ်ခွာထွက်ပြေးနေတဲ့ ၎င်းစစ်ကြောင်းကို ဆက်လက်ပြီး လိုက်လံချေမှုန်းနေတယ်လို့ AA က ထုတ်ပြန်ထားတာပါ။

လက်ရှိ အာဏာသိမ်းစစ်တပ်က ထိုးစစ်နေတဲ့ ဒီစွန်တက်ရွာဆိုတာ ရခိုင်နဲ့ မကွေးတိုင်းဆက်သွယ်ထားတဲ့ အမ်း-မင်းဘူး ကားလမ်းကို ထိန်းချုပ်ဖို့ အရေးပါတဲ့ လမ်းကြောင်းပေါ်မှာ ရှိနေတာပါ။

ဒါ့အပြင် ငဖဲမြို့နယ်ထဲက အာဏာသိမ်းစစ်တပ်ရဲ့ အရေးပါတဲ့ နတ်ရေကန် လေကြောင်းရန် ကာကွယ်ရေးစခန်းကိုလည်း AA နဲ့ တော်လှန်ရေးတပ်တွေရဲ့ ထိုးစစ်ဆင်နေမှုကို ကာကွယ်ဖို့အတွက် အရေးပါတဲ့ နယ်မြေတစ်ခုလည်းဖြစ်နေတာပါ။

ဒီနတ်ရေကန် ဗျူဟာစခန်းကုန်းဟာ ပုသိမ်-မုံရွာကားလမ်းကိုလည်း ထိန်းချုပ်ဖို့ အရေးပါတဲ့ ဗျူဟာတစ်ခုဖြစ်ပြီး ဒီစခန်းကို အာဏာသိမ်းစစ်တပ် လက်လွှတ်လိုက်ရရင်တော့ မကွေးတိုင်း၊ ဧရာဝတီတိုင်းတွေကို AA တပ်တွေ ယခင်ကထက် ပိုမိုထိုးဖောက်ဝင်လာနိုင်တယ်လို့ စစ်ရေးလေ့လာသူတချို့က သုံးသပ်ပါတယ်။

ဒီဒေသမှာ AA တပ်တွေအပြင် မကွေးတိုင်းထဲက AA မဟာမိတ် တော်လှန်ရေးတချို့လည်း လှုပ်ရှားနေပြီး စစ်ကော်မရှင်ကို ပူးပေါင်းတိုက်ခိုက်နေကြတာပါ။

လက်ရှိမှာ အာဏာသိမ်းစစ်တပ်ရဲ့ စစ်မှုမထမ်းမနေရ ဥပဒေကြောင့် အတင်းအဓမ္မ စစ်သားစုဆောင်းခံရပြီး ရှေ့တန်းပို့ခံထားရဲ့ သင်တန်းဆင်း တပ်သားသစ်တွေအနေနဲ့ စောစီးစွာ အလံဖြူထောင် လက်နက်ချမယ်ဆိုရင်တော့ အသက်ချမ်းသာရမှာဖြစ်ပြီး AA တပ်ဖွဲ့ရှိရာ ဘယ်နေရာကိုမဆို အချိန်မရွေး လာရောက် လက်နက်ချအညံ့ခံနိုင်တယ်လို့လည်း AA က ထုတ်ပြန်ထားတာပါ။

လက်ရှိမှာ အာဏာသိမ်းစစ်တပ်ဟာ ဧရာဝတိုင်းနဲ့ ရခိုင်ရိုးမအစပ် ရေကြည်မြို့နယ်ထဲက စက်စက်ယိုကျေးရွာ၊ ပဲခူးတိုင်းနဲ့ ရခိုင်ပြည်နယ်အစပ် ငဖဲမြို့နယ်က ကျေးရွာတွေကို အင်အားအလုံးအရင်းနဲ့ ထိုးစစ်ဆင်တိုက်ခိုက်မှုတွေကို အရှိန်မြှင့်လုပ်ဆောင်နေပြီး AA တပ်တွေနဲ့ တိုက်ပွဲတွေ ဆက်လက်ဖြစ်နေတယ်လို့ AA က ထုတ်ပြန်ထားတာပါ။

မြိတ်ခရိုင်၊ ပုလောမြို့နယ်၊ ထမင်းမစားကျေးရွာမှာ တပ်စွဲထားတဲ့ စစ်ကော်မရှင်တပ်စခန်းကို ဒီနေ့မနက်ပိုင်းက ကရင်အမျိုးသားလွတ်မြောက်ရေးတပ်မတော် (KNLA) နဲ့ KNU တပ်မဟာ (၄) လက်အောက်ခံ KNDO တပ်ရင်း ၊ ပြည်သူ့ကာကွယ်ရေးတပ်ဖွဲ့ (PDF) တပ်ရင်းတွေအပါအဝင် တော်လှန်ရေးပူးပေါင်းတပ်တွေက ဝင်ရောက်တိုက်ခိုက်ပြီး သိမ်းပိုက်နိုင်ခဲ့တာပါ။

ဒီတပ်စခန်းဟာ အာဏာသိမ်းစစ်ကော်မရှင်တပ်ရဲ့ ခလရ (၂၈၀) တပ်ရင်း၊ အမတ(၃၀၉)တပ်ရင်း၊ အမှတ်(၁၂) တပ်မတော်လေ့ကျင့်ရေးသင်တန်းကျောင်းတပ်ဖွဲ့ဝင်တွေအပါအဝင် စုစုပေါင်း အင်အား ၄၀ နဲ့ တပ်စွဲထားတဲ့ တပ်စခန်းလို့ ဆိုပါတယ်။

ဒီတိုက်ပွဲမှာ စစ်ကော်မရှင်တပ်ဘက်က သိမ်းဆည်းရမိတဲ့ လက်နက်ခဲယမ်းတွေရဲ့ ဓါတ်ပုံမှတ်တမ်းတွေကိုလည်း KNU ရဲ့ သတင်းထုတ်ပြန်ချက်မှာ ဖော်ပြထားပါတယ်။

ဒီစခန်းသိမ်းတိုက်ပွဲမှာ စစ်ကော်မရှင်တပ်ဘက်က သေဆုံးမှုရှိပြီး စခန်းစွန့်ခွာထွက်ပြေးသွားသူတွေလည်းရှိတယ်လို့ ဆိုပါတယ်။

ထမင်းမစားကျေးရွာဟာ ပုလောမြို့နယ်အထွက် မြိတ်- ထားဝယ်ကားလမ်းပေါ်မှာတည်ရှိပြီး ၎င်းကားလမ်းပိုင်းကို လုံခြုံယူထားတဲ့ တပ်စခန်းပါ။

ပြီးခဲ့တဲ့လပိုင်းထဲက နိုင်ငံရဲ့ တောင်ပိုင်းဒေသတွေဖြစ်တဲ့ မြိတ်-ပုလော-ထားဝယ် ကားလမ်း၊ ရေး-ထားဝယ် ကားလမ်းတွေမှာ စစ်ကော်မရှင်တပ်နဲ့ တော်လှန်ရေးတပ်တွေ တိုက်ပွဲတွေ ဆက်တိုက်ဖြစ်နေပြီး ဒီကားလမ်းတွေကိုလည်း ပိတ်ထားရတာပါ။

တနင်္သာရီတိုင်း၊ ပုလောနဲ့ ပလောက်မြို့တွေမှာ ဒီနှစ် ဇူလိုင်လကုန် နဲ့ ဩဂုတ်လဆန်းပိုင်းအတွင်း စစ်ကော်မရှင်တပ်နဲ့ တော်လှန်ရေးတပ်တွေ တိုက်ပွဲ အကြိမ် ၃၀ နီးပါး ဖြစ်ခဲ့တယ်လို့ ပြည်သူ့ကာကွယ်ရေးတပ်မတော် မြိတ်ခရိုင် အမှတ် (၁) တပ်ရင်းကလည်း ထုတ်ပြန်ထားပါတယ်။

ပြီးခဲ့တဲ့လ ၁၈ ရက်ကလည်း ပုလောမြို့နယ် အောင်ပူကျေးရွာအုပ်စုအတွင်းက စစ်ကော်မရှင်တပ်ရဲ့ တမိုင်းတောင်စခန်းကုန်းကို တော်လှန်ရေးတပ်တွေ ဝိုင်းပတ်ပိတ်ဆို့ထားတာကြောင့် စစ်ကော်မရှင်တပ်ဟာ ဒီစခန်းကုန်းကို စွန့်ခွာသွားခဲ့ပြီး KNLA နဲ့ တော်လှန်ရေးပူးပေါင်းတပ်တွေက နယ်မြေရှင်းလင်းရေးလုပ်ပြီး ထိန်းချုပ်နိုင်ခဲ့ပါတယ်။

သပိတ်ကျဉ်းမြို့နယ် ကျောက်ဖြူရွာကို စစ်ကော်မရှင်တပ်က လေကြောင်းကနေ မနေ့က တစ်ရက်တည်းမှာ နှစ်ကြိမ်ဗုံးကြဲခဲ့ပြီး ရွာအတွင်းက စာသင်ကြားနေတဲ့ နေအိမ်ကို ထိမှန်ခဲ့တာကြောင့် ၁၀ နှစ်အရွယ် ကလေးငယ်တစ်ဦး သေဆုံးခဲ့ပြီး ကလေးငယ် ငါးဦးအပါအဝင် ဒေသခံ ခုနစ်ဦး ထိခိုက်ဒဏ်ရာရသွားတယ်လို့ MDY-PDF တပ်ရဲ့ ထုတ်ပြန်ချက်မှာ ဖော်ပြပါတယ်။

ပြီးခဲ့တဲ့နှစ် အခုလိုကာလမှာပဲ သပိတ်ကျဉ်းမြို့ရဲ့ အရှေ့မြောက်ဘက်မှာရှိတဲ့ ဒီရွာက စစ်ကော်မရှင်စခန်းကို မန္တလေး PDF ပူးပေါင်းတပ်တွေ ထိုးစစ်ဆင်တိုက်ခိုက်ပြီး သိမ်းပိုက်နိုင်ခဲ့တာပါ။

ပြီးခဲ့တဲ့လပိုင်းမှာတော့ စစ်ကော်မရှင်တပ်ဟာ သပိတ်ကျဉ်းမြို့ပေါ်ကို ရေလမ်းကနေ အင်အားဖြည့်ပြီး မြို့ကို ပြန်လည်ထိန်းချုပ်ခဲ့ပါတယ်။

ဧရာဝတီမြစ်ကမ်းဘေး နဖူးတင်ထားတဲ့ သပိတ်ကျဉ်းမြို့ပေါ်မှာ အစိုးရုံးတွေနဲ့ ကားလမ်းတချို့ကို ပြန်ထိန်းချုပ်ပြီးနောက်ပိုင်းမှာ တော်လှန်ရေးတပ်တွေရှိရာကို စစ်ကြောင်းထိုးနေတာကြောင့် တိုက်ပွဲတွေဖြစ်နေတယ်လို့ မန္တလေး PDF က အသိပေးပါတယ်။

ဒါ့အပြင် စစ်ကော်မရှင်တပ်ဟာ ပြီးခဲ့တဲ့လပိုင်းစပြီး သပိတ်ကျဉ်းနယ်မှာ နယ်မြေပြန်လည်စိုးမိုးနိုင်ဖို့နဲ့ မြို့နယ်ရုံးတွေ ပြန်လည်လည်ပတ်နိုင်ဖို့ သယ်ယူပို့ဆောင်ရေး ရဟတ်ယာဉ်တွေအသုံးပြုကာ အင်အားဖြည့်တင်းနေတယ်လို့ ဒေသတွင်း တော်လှန်ရေး သတင်းရင်းမြစ်တစ်ဦးက ပြောပါတယ်။

လက်ရှိမှာ စစ်ကော်မရှင်ရဲ့ တကျော့ပြန်ထိုးစစ်ကြောင့် သပိတ်ကျဉ်းမြို့နယ်က လေးမိုင်၊ ငါးမိုင်၊ ခြောက်မိုင် ရွာတွေအပါအဝင် ကျေးရွာပေါင်း ၁၀ ရွာခန့်က ဒေသခံထောင်နဲ့ချီပြီး စစ်ဘေးရှောင်နေကြရတာပါ။

“သပိတ်ကျဉ်းနဲ့ ခုနစ်မိုင်တပ်မှာ လက်နက်ကြီးအထိုင်ချပြီး ရွာတွေကို လှမ်းပစ်နေတော့ အဲဒီက ရွာက ဒေသခံတွေ အကုန်တောထဲမှာ ရှောင်နေကြရတယ်။ မြေပြင်စစ်ကြောင်းလည်းထိုးနေတယ်။ ကြည့်ရတာ ရွေးကောက်ပွဲအတွက် ကြိုပြင်နေတယ်။ မြို့ပေါ်ကိုလည်း Non-CDM တွေ ပို့ပြီး ရုံးလုပ်ငန်းတွေ လည်ပတ်ဖို့လုပ်နေတယ်” လို့ သပိတ်ကျဉ်းနယ်က စစ်ဘေးရှောင်တွေကို ကူညီနေသူတစ်ဦးက ပြောပါတယ်။

စစ်ကော်မရှင်တပ်ဟာ တော်လှန်ရေးတပ်တွေ ထိန်းချုပ်ထားတဲ့ မန္တလေးတိုင်းထဲက မိုးကုတ်၊ စဉ့်ကူး၊ သပိတ်ကျဉ်းမြို့နယ်တွေမှာ အခုလို လေကြောင်းတိုက်ခိုက်မှုတွေ မကြာခဏ ပြုလုပ်နေပြီး ဒေသခံတွေ အစုလိုက်အပြုံလိုက် သေဆုံးတဲ့ ဖြစ်စဉ်တချို့လည်း ရှိခဲ့ပါတယ်။

ပြီးခဲ့တဲ့လပိုင်းက မိုးကုတ်မြို့အရှေ့ပိုင်းကို စစ်ကော်မရှင်တပ်ဗုံးကြဲတာကြောင့် ဒေသခံ ၂၀ ဦးကျော် ထိခိုက်သေဆုံးခဲ့ရပါသေးတယ်။